IGREJA PRESBITERIANA DE MOÇAMBIQUESociedade Presbiteriana das Mulheres de CaridadeXikhongoto xa Vavasati va IPM, 2 de Maio de 2010

Nhloko ya mhaka: Xidrilo xa Vavasati va IPM (Jer 9:17-20)

Mufambisi 1

Vamamana, vatatana, vamakwerhu hosini ni vafambisi va kerheke: Hamilosa hivito

dra Hosi yerhu Yesu Kriste bzixile. Hamihoyozela ntirweni wa xikhongoto xa siku dra

namuhla hili hoyo-hoyo, ahidrileni kunwe!

Nahingasisungula mintirho ya siku dra namuhla, hirhandra kumitlamuxela xivangelo

xa siku hindlela le:

Vavasati va IPM vanyikiwile siku ledri hi Sinodo akuva hadrone vakhongota kunwe

ni kerheke. Xikhongoto lexi xini nkongometo wakukombela kunwe kupfuniwa hi

Xikwembu kumhaka kumbe svikarhatu svini na svini lesvi vavasati vavonaka lesvaku

svafanela, kumbe kutlangela nyiku yini na yini, akuva ntirho waHosi wuya mahlweni

ndreni ka ntwananu ni kurhula.

Lembe ledri dra 2010, vavasati vahlawuli nhloko ya mhaka leyi yinge: Xidrilo xa

vavasati va IPM. Kunene vavasati va IPM vale xidrilweni hikusa vavona kerheke

ledri drimbombaka. Vasvitiva lesvaku kerheke drile tikweni lani kutaliki svihila lesvi

svixanisaka vahanyi vadrone. Kambe hitlelo drinwana kerheke i livaningo, i munyu

wa misava (Mt 5:13-16). Hikola ka svone drini ntirho wakuvaninga kusukela ndreni

hilaha Hosi Yesu ahidondrisiki hakone loko ate: Ayindlu yanga, yitava yindlu ya

kukhongota kuyone. (Mt 21:13 ;Lk 19:46).

Vavasati va IPM vadjula kukhongota kunwe ni kerheke namunhla, vakombisa

kuxukuvala kwavu hikola ka kuxaniseka loku kerheke dritlanganaka nakone

himatlelo hinkwawu, kusukela mahanyela mindangwini, kerhekeni nile tikweni,

1

mavabzi, vusveti bzanyama nibzamoya, matirhela ni kutirhisana kwerhu kusukela

mazoneni kuyatlasa kerhekeni.

Vamakwerhu hosini, vavasati va IPM varhamba hinkwenu, lavakulu nilavatrongo,

akuva hinhingena himoya wunwe axikhongotweni xa lembe ledri, hilikarhi hitisola

nikukombela ntamu wakuya mahlweni hitirhela Hosi.

Xana hayini vahlawuli nhloko mhaka leyivulavulaka hixidrilo?

Xikhongoto xerhu hixikuma kubuku dra Yeremia. Yeremia avitaniwi avumpsheni

bzakwe akuva afambisa tiko drakutiyalisa. Nfurhi Xikwembu aximufihlelanga

lesvaku angatiyingisetiwa, kambe nambi xitiva lesvo xiyi mahlweni ximurhuma.

Yeremia atirhi ndreni ka kunononhwa lokukulu kambe atiyiselile kutlasa vuganwini.

Kutiyalisa katiko kuyentxi lesvaku dribiwa nikuyisiwa vukarhaweni na nkongometo

wuli wakuva drivona xihoxo xadrone, dritisola.

Wansati loko alavisa lesvi svihumelelaka kerhekeni dra IPM avona lesvaku kuni lesvi

hihlulekaka kumbe hitiyalisaka kusvone kufana nitiko dra Israel. IPM angahalandri

ndlela leyi adondrisiwiki yone hivakokwana ni vapsele. IPM andruluki wakuhluleka

himatlelo hinkwawu nixihlekiso tikweni.

Vavasati, Vavanuma, madjaha, vahwanyana na vakokwana, buyani hidrilela IPM,

buyani hitisola, hikombela kudrivaleliwa kuhlulekeni kwerhu.

Svosvi, munwana ni munwana a alosi lwe anga thlelweni drakwe na ahlaya aku:

Nakulorhi, tisoli kuhluleka kwaku mahlweni ka Xikwembu

Lisimu la 12 ndrimana yakusungula ntsena

Mufambisi 2

Ahisunguleni: Yanakanyani, nwiyavitana vavasati lavativaka kudrila; avahatle

vahidrilela, akuva mahlu yerhu mahumexa minyembeti, ni tihohe terhu titala

himati. Dondrisani vana venu va vavasati akudrila, nwidondrisana hinkwenu alisimu

lankosi, hikusa akufa kutlulela hi madjinela yerhu, kunhingena tindlwini terhu!

2

Akupfuniwa kwerhu akuve hivito dra Tatana, nidraNwana,

nidraMoyalowakuXwenga, Amen.

Ahisekelekeni hiyima hiyimbelela lisimu la 30

Mufambisi: Tanani, buyani higandrela Xikwembu, mutumbuluxi ni Tatana werhu,

nhlovo ya vutomi, Moya lowuhintruxaka mapindreni ya xidoho ni lifu!

Kerheke: Ahitlanganeni hidrumisa Yesu Kriste musunguli wa kerheke, hilikarhi

hidrimuka tinsasi ta vavasati ni tavavanuna leti tihirhangeliki kupfumeleni, leti

tihidorndisiki kutiva Xikwembu nikuxitirhela. Ahitlanganeni, hikombela

kufambisiwa hiMoya lowakuXwenga.

Mufambisi: Kugandrela ikupfula milomu ni timbilu terhu, akuva sviyamukela ntamu

waxihlayelanfurhi ni lirhandru dra Xikwembu;

Kerheke: Tanani hidrila mahlweni karhibze drahuluku drerhu!, hilikarhi hidumba

lesvaku kudrila kwerhu kutayingeliwa, kutayamukeliwa, kutabeka mihandru

minene, lemitaka yentxa lesvaku Xikwembu xitxabziwa tikweni hinkwadru!

Ahiyimbeleleni lisimu la 2

Mufambisi aya mahlweni aku: Vamakwerhu, svosvi inkama wakudrila kawansati

hikola ka vana.

Loko ndritiyingeli ndrili wansati, ndrikombelile ku Xikwembu xanga akuva

xindrinyika nwana. Kunene xindrinyikile, ndriva ndritrava hayene, kambe namuhla

nwanaga andritrikile, asukile kaya, afambi ni tiko. Hala nihala kutwala svidrilo

ntsena, vapsele vadrilela vana lava vayalaka kudondra, vayalaka kutirha, vayalaka

kurhumiwa, varhandraka kuhemba, kuyiva, kupopsa ni svinwana lesvi svivasuselaka

vutomi. Yowééé, lexi ixidrilu xawansati wa IPM, adrilela nwanakwe lwe afambiki

nitiko!

Kerheke: Hosi, yingela xidrilu xerhu, uhiyangula!

3

Mufambisi: Wansati ale nhlomulweni lowukulu, hikusa avona vana lava vafaka

hindlala, hi malaria, hisida. Avona vana vakwe lava vabaleseliwaka svitaratwini nile

timhakweni hi svigevenga kumbe mapholisa; wansati abankosi hikola kahkombo

ledri, awabongosa, hikusa nhlomulu wakwe hilowukulu. Xana i mani lwe ataka

yima, apfuxa lwemumpsha wa IPM, lwe ataka dondrisa mumpsha kulobze,

amukomba Yesu muhuluxi wakwe xana?

Kerheke: Hosi, yingela xidrilu xerhu, uhiyangula!

Mufambisi: Wansati wa IPM awa drila, hikusa anwanakwe atlaviwi himbanga

leyinga holiki, Kambe akunalweyi amutwelaka vusiwana. Akuna lweyi adondraka

makungu yakubekisa xirhombe, yakuxikomba Yesu. Akuna lweyi angani makungu

yakupfula komponi yakuwundla lwemumpsha. Xikwembu xa vilela, xavutisa xili:

Xana a IPM akuna nyanga ke? Xana akuna murhi kone, lesvi anwananga lwentrongo

afaka hinyambondzwana na wene uku kurhulile? Xana hikola ka yini wene IPM

urhandra kufa kutlula kuhanya xana?

Kerheke: Hosi, kunene hivahluleki, hatisola. Hidondrisi ndlela yakubekisa vana

lava uhinyikaka vone hilirhandru.

Ahikhongoteni:

Xikwembu mutumbuluxi wavhanu hinkwavu, kuwene hinkwerhu hafana, hikusa

hihambiwi xifanisweni xaku. Wene u Xikwembu lexi anga Tatana ni Mamana werhu,

lexi xibekisaka vana vaxone hilirhandru naxinga hlawuli. Hakutlangela siku dra

namuhla, ledri uhlohloteliki vavasati va IPM akuva vapfuxa mapfalu ya vamakwavu.

Hatisola kuhlukeka kwerhu. Hikombela upfula mahlu yerhu ya moya, akuva hivona

lomu hiwaka kone, hitisola himbilu, hindruluka. Hidondrisi kukombisa lirhandru

himintirho leminene, hibekisa svirhombe, niku bekela xivumbiwa xinwana ni

xinwana xitxavu, hivito dra Nwanaku Yesu Kriste. Amen

Lisimu hi Juventude

Mufambisi 3

4

Hitaya mahlweni, hilikarhi hidrilela wansati ni wanuna va IPM.

Xikwembu xa mavoko lamaholisaka, wansati wa IPM akarhamisi nhamu yakwe

mahlweni kwaku, na atali himinpfembeti yakubiwa, hikola katihanyi ta tinxakanxaka

letingakone mindangwini.

Wansati akhaviwa hisvifambu na ani nyimba, ayamasiwa tinhama ni kukokiwa

minsisi, atroniwa svakuda lesvi asvikumiki hinyuku wakwe, arhukiwa mahlweni ka

vana ni vayakelani, athxipisiwa, apfumala ni kakutrutrumela kone! Hosi, yingela

xidrilu xawansati wa IPM,

Kerheke: Hosi, hiyingela kuvavisa himhaka le. Hipfuni kundruluka, hihanya

hikurhula mundangwini yerhu.

Mufambisi: Wansati wa IPM awa drila, hikusa andruluki xakukandlela. Apfukeliwa

hi nuna, apfukeliwa hi vana, apfukeliwa hiwansati kulobze, atrongahatiwa hi

kerheke. Atrandreliwi matlelo hinkwawu, akuna lwe amurheyelaka ndleve.

Angahana xintruti ndangwini, kerheni nile tikweni. Loko akumeka na ani

xipungwana xa SIDA ahlayiwa ngwavava, ahlongoliwa vukatini, kambe vavasati

lavanyingi, vativa ntsena nuna wavumphsa bzavu. Vanwana vatrema mhaka

hikunwa phalafeni, vatihisa, vatisunga hadrone. Hosi yingela xidrilo xawansati wa

IPM

Kerheke: Hosi, hiyingela kuvavisa himhaka le. Hipfuni kundruluka, hihanya

hikurhula mundangwini yerhu.

Mufambisi: Wansati wa IPM awa drila, hikusa anwanakwe wa xisati andruluki nsati

kulobze. Vanwana vavanuna mindangwini vani xihundla nivana vavu vaxisati.

Nhlomulu iwukulu hikusa vanitingana kupaluxa xihundla lexi.

Kerheke: Kunene we Hosi, ndrahluleka kukombisa kupfumela kwanga himintirho

leminene. Ndratisola, ndridrivaleli Xikwembu xa timpsalu!

5

Mufambisi: Navone vavanuna vale kuxanisekeni lokukulu hikusa vasiyiwa nimiti

vakughoo. Wansati kahali la ayiki kugweveni, angadrimuku ntraku. Nuna ni vana

vasala nhlomulweni. Loko abuya ipongwe ntse, akuna ntxumu lexikombisaka lesvi

atirhaka svone. Vanwana vavasati vatrhama masenta baixo, vamuka kaya

navenkha, akuna kurhula. Hosi, yingela xidrilo xawansati wa IPM

Kerheke: Kunene we Hosi, ndrahluleka kukombisa kupfumela kwanga himintirho

leminene. Ndratisola, ndridrivaleli Xikwembu xa timpsalu!

Mufambisi akombela tatana munwe akhongota

Lisimu: 125 tindrimana ta 1,2 na 3

Mufambisi 4

Ahidrileni vamakwerhu, hidrilela kerheke ledrisuvaka. Tiyindlu takusontela kutone

tahohloka, tinwana ititrongo, atahayaneti mhunu, kunwana vasonta ahandle,

vaxanisiwa himoya, mumu ni npfula. Kunwana vakriste vatikarhata kuhumexa

minhlengo, akuva valulamisa kumbe kuyaka tiyindlu letinene, kambe avavoni

mihandru ya tinyiku leti vahumesaka. Hosi, yingela xidrilu xa wansati va IPM.

Kerheke: Kunene we Hosi, ndrahluleka kukombisa kupfumela kwanga himintirho

leminene. Ndratisola, ndridrivaleli Xikwembu xa timpsalu!

Mufambisi: Hala ni hala svifundreni kutwala minkosi nikubongosa, hikusa akuna

kuyingelana xikarhi ka vakriste hinkwavu, akuna xitxavu, kufuma kulumbetana,

kuvengana nikususumetana. Moya wa ximinemine wundruluti nfumu wa matilu,

wuva nfumu wa vhanu. Vafundrisa vahleva vafundrisa kulobze ni vakriste, vanwana

vanwa navu ni kunhingena kusvihila svaku biha, kerhekeni ke banfééé, I vusiwana

ntse. Yowééé, kubongosa wansati. Xana atavadrini wene IPM utaka biwa hilipfalu

utisola hixihlayelanfurhi xana?

Kerheke: Yowééé, mine muxanisi wa kerheke dra Yesu. Ndritwa kukameka

kambilu, ndradrila, ndrikombela lesvaku undridrivalela we Hosi Xikwembu xanga!

6

Mufambisi: Hala ni hala svifundreni kutwala svidrilo, hikusa mintirhoya kerheke

amahalandriwi svinene. Tinhlengeletanu atihanyi, kuyimbelela kanyamalala, akuna

kupfuxelana nambi kukhongotelana. Vakriste vapfumala xithxavu ku vatirhi,

vayentxa kurhandra havone, vavatrona nikati dra siku ni siku ledri mhunu afanelaka

kuhanya hadrone. Vakriste vapfumala vusungukati, lirhandru drikutxukile, Kufuma

mona, svifingeto xiluvelweni,Yesu asala kule. Hosi, yingela xidrilo xawansati wa

IPM.

Kerheke: Xana we IPM imani lwe ataka kutwela vusiwana xana? Imani lwe ataka

kupfuxela, lesvi utlangaka hiHosi Xikwembu xaku xana?

Lisimu: 124 tindrimana ta 4 kutlasa 7

Mufambisi 5

Ahiyingeleni marhitu ya timpsalu ta Xikwembu: Tanani kumine hinkwenu

lavakarhaliki,nanwine mibindriwaka, ndrita nwiwisisa! Tibzatrelani ampinga wanga,

nwuva nwidondra kumine, hikusa ndrimbulwa, wambilu ya kutitrongahata,

nwitakuma kuwisa amimoyeni yenu, haleluya.

Ahitlangeleni kudrivaleliwa, hikuyimbelela lisimu la 143, hilikarhi hitihlaya

kupfumela hadrone. Ahisekelekeni

Svosvi inkama wa nyiku. Ahihumexeni tinyiku terhu, tikombisa kupfumela ni

kutlangela kudrivaleliwa hi Xikwembu, na hiyimbelela lisimu la 178 ntraku ku

khongoteliwa nyiku.

Mufambisi: Ahi khongotelaneni

Xikwembu ni Tatana werhu, hirhandra kubeka mavokweni yaku vana verhu lava

vapfumalaka vapsele, lava vasukiki mindangwini vahanya tindleleni, lava vavabzaka

himavabzi ya tinxakanxaka, lava vapfumalaka lirhandru ni xitxavu ku vapsele, lava

vayalaka dondro. Uvavumbile hikuvarhandra xifanisweni xaku, vadrimuku Tatana

wa timpsalu.

7

Hibeka mavokweni yaku vapsele mindangwini, mintirweni ni lava vakumekaka

mabohelweni, svibedlele ni kunwana. Mintrwalu yavu mabindra, vanwana

vakarhalile, vana mutiyisi ni mutxaveleli wavu.

Hibeka mahlweni kwaku vatirhi hinkwavu va kerheke. Vatremakanya nkama

wakunononhwa, masiku manwana avavoni lomu vayaka kone hikola kakubindra ni

kutxavisa kalesvi vasviyentxaka ni lesvi vasvitremakanyaka. Masiku manwana

vanindringo wa kuteka Nfumu waku va wuyentxa nfumu wavu la misaveni.

Vatlanga hintirho lo uvanyikiki wone. Tatana, bana lipfalu lavu, uva uvadrivaleli

hikutala ka timpsalu taku, uva upfuxa mapfalu, akuva vakutirhela hi lirhandru

nikudumbeka.

Bekisa tiko dra Musambiki, bekisa nfumu wadrone. Hikombelela ni kerheke dra

misava hinkwayu, akuva driyaka Nfumu waku misaveni ni kubekisa vunwe avitweni

draku. Hikombela hinkwasvu hivito dra Yesu Kriste lwe ahidondrisiki xikhongoto

lexi---Tatana werhu....Amen

Activista a yimbelela

Mufambisi 6

Ahihlayeni Bibeleni ku Testamente ledrakhale, bukwini dra Yeremiya 9:1-9 na

Mateu 11: 28 - 30

Lisimu la 38 nakunyikiwa nkama mudondrisi wasiku

Mufambisi 7 i Mudondrisi wasiku. Atahlaya Yeremiya 9: 17-20

Mufambisi 8

Svosvi inkama wakukhongota (Vhanu vabirhi)

Lisimu hi Vamamana

Nkama wa Dizimu

Nkama wa svitiviso

Nkama wa kuyimbelela mintlawa le misaliki na kupfala a coro dra Kerheke

Rhitu hi Kerheke (Konsistori)

8

Rhitu hi mufambisi wa Xifundra nikupfala ntirhu hi Matovoko

9