1

Chyurum Wunpawng Sha Ni A Matu Myihtoi Mihka A Mungga

I. Myihtoi Laika A Shingdu Labau

Myihtoi Mihka a lam: Mihka ngu ai ga hkum a lachyum gaw “Karai Kasang zawn re ai wa (who is like Yaweh) ngu ai re. Shi gaw Morasha (1:2,24) mare kaw nga ai wa re. Morasha mare gaw Yerusalem a sinna dingda maga deng 20 daram tsan ai, Tekoa mare kaw na deng 7 tsan ai, Hpilisti ni a Gath mare hte ni dik ai Israela gajarit kaw nga ai mare langai re. Morasha mare gaw ga sau nam hpun grai kaja ai, bum mayan hte layang ga a lapran na kadit kaw de da ai mare re. Yi hkauna galaw sha ai hte sagu bainam rem sha ai dinghku kaw na matsan mayan rai grit nem ai hte kaba wa ai wa re. Grai gum sheng ai lamu ga madu ni a lata e nni nkri hkrum ai, dip da hkrum ai masha ni a lapran kaba wa ai wa re. Dai majaw shi gaw dip da hkrum ai nni nkri hkrum ai matsan masha ni a matu tsun shaga ya ai wa re. Karai Kasang shi hpe gara hku nna mihtoi hku shaga la ai ngu ai hpe n chye lu ga ai. Rai tim 3:8 hta Yehowa a Wenyi jaw e n-gun atsam, hpung dagu lu la ai hte Karai Kasang a mungga tsun ai re lam ka da nga ai.

Myithtoi htoi ai aten: 1:1 hta Mihka gaw Yuda hkaw hkam Yotham(742-735), Ahaza(735-715) hte Hezekia(715-687) ni a aten hta myihtoi htoi ai wa re ngu ka da nga ai. Yerimia 26:18 hta mung Mihka gaw Yuda Hkawhkam Hezekia up hkang ai aten hta myihtoi htoi ai wa re lam rawng nga ai. Hkawhkam Yohtam gaw BC 742 hta hkaw hkam tai wa ai wa rai nna, Hkawhkam Hezekia a up hakng ai aten gaw BC 687 du hkra re. Mihka a myihtoi ga gaw Asuri ni Samari mare hpe rai n gasat la shi ai aten kaw na hpang sai re. Asuri ni Samari mare hpe BC 722 hta gasat la ma ai. Asuri ni Yerusalem hpe jahkrit shama ai aten (1:9,12), Myihtoi Esia a aten hte maren hta sasana bungli galaw ai majaw, BC 740 hte 701 lapran hta myihtoi htoi ai wa re ngu, chyum ninghkring ni law malawng hkam la ma ai.

Mung Masa Shingdu Labau: Mihka gaw a aten hta Yuda mungdan hta sut su tim mung masa n sim n sa ai lam byin pru wa ai. Hkaw hkam Yohtam a lak htak hta Yuda mung gaw sut su nga mai ai mingdan re. Rai tim j gumhpraw ra marin ai hte n tara ai hku amyat htuk sha ai lam nib yin pru nga ai. Yotham a hpang Ahaza bai hkaw dung wu ai. Suri mung hte Israela mung ni pawng nna, BC 735 hta Asuri hkaw hkam hpe gumlang na matu Yuda hkawhkam Ahaza hpe atik anang saw shaga ma ai Dai hpe myihtoi Esaia gaw kadai hte mung npawng ai tinang hkrai Karai Kasang hpe maoi let ngang ngang tsap nga na hpe hpea ji jaw wu ai. Rai tim Yuda hkaw hkam Ahaza gaw Asuri hkawhkam Tiglath-Pileser hpe mayun kum hpa jaw nna jinghku hku let Suri hte Isarela mung ni a hpyen na makawp maga la na matu garum hpyi wu ai. Dai majaw Tiglath Pileser gaw Suri-Israela jinghku hpung hpe gasat shamyit nna, Israela mung a mare daju Samari mare hpe BC 722-721 hta gasat ting la sai. Rai tim Yuda hkaw hkam Ahaza shi nan mung shim lam n lu ai sha, Asuri ni gasat ting la na hpe hkrit tsang ra ai madang du mat wa wu ai. Ahaza gaw Asuri hpe ahkun hkanse jaw ai hte Asuri a npu e shingbyi ra mat wu ai.

2

Ahaza a hpang shi a kasha Hezekia BC 715 hta hkaw bai dung sai. Hezekia gaw marai rawng ai hkaw hkam re majaw Asuri a npu n taw ai sha awng dawm mungdan hku nga wu ai. Asuri hpe ahkun hkanse n jaw sai; Mihka a mungga hte maren nawku daw jau ai lam hpe jasan jaseng ai hte gram lajang woi sai (Yeremia 26:18f). Tsaw ai kawng na masat nawku htingnu ni hpe shaza kau nna, Hkanan masha ni a nawku htung ni hkan gayau nang ai hpe mung shamyit kau wu ai. Yerusalem nawku htingnu hpe ahkyak da na matu shachyoi shapra gram lajang ai lam ni woi galaw wu ai (II Hk. Hk 18). Nawku htingnu kaw na Asuri ni a nawku htung hpe mung la jasan kau ai lam galaw wu ai. Yerusalem bunghku ni hpe shangang shakang ai hte mare bunghku bai jat ai lam galaw wu ai (II Hk. Labau 32:5,30). BC 705 hta Asuri hkaw hkam Sargon si ai hpang Sennahkrib hkaw hkam bai tai wa ai. Dai aten hta Babylon hkawhkam Berokabaladan woi awn ai hte(II Hk.Hk 20:12) Asuri Empire hpe gum lang ai lam shara shagu hta byin wa sai. Dai hta Hezekia mung shi a mungdan Asuri ni a lata kaw na shanglawt lu na matu shang lawm wu ai. Dai majaw Asuri hkaw hkam ningnan Sennahkarip gaw shi a empire he gumlang ai ni hpe gasat shamyit wu ai. Shawng ningnan Babylon hkaw hkam Berodakbaladan hpe shawng gasat wu ai. Dai hpang Hpiliki (Phoenitia) hte Hpilisti pa du hkra gasat nna, Egutu ni hpe mung shamyit kau wu ai (Mihka 1:10-16). Yuda mung ting hpe mung shaza kau ya ai majaw, Hezzekia gaw kalang mi bai Asuri hkaw hkam npu taw let, hpyen hka wa ai hku nna ja gumhpraw law law hpe jaw kau ran u ai (II Hk. Hk 18:13-16).

Lahta na zawn re ai mung masa shuk ai aten hta Mihka myihtoi htoi ai re.

Shinggyim nga pra lam hte seng ai shingdu labau: Mihka a aten hta Yuda mung gaw grai nga mu nga mai ai. Rai tim, arawng kaba lu ai nig aw matsan masha ni hpe n tara ai hku dip sha roi sha ma ai. Hezekia gaw makam masham hpe gram lajang ai hta grai ram tim, mung masa hku woi awn ai hta gawng kya wu ai. Makam masham hpe woi gram ai lam mung shi a mung masa ahkaw hkang shangang na matu lajang la ai lam hpe madung dat ai lam rail u ai. Dai majaw shi a makam masham masa gram lajang woi tim mung masha ni hpa n galai shai ma ai. Mungdan gaw, hten za wa ai. Lu su ai ni gaw matsan ai ni a ntsa bawd aw maw roi rip sha ai hku nna grau grau lu su wa ma ai. Mung up ai ning baw ningla ni, tara agyi ni myihtoi ni, hkinjawng ni mung gum hpraw myiman yu nna asak hkrung ai ni law wa ma ai. Yehowa a tara hpe n gawn nsawn di nna, maigan hpara ni shara shagu hta tawn nna nawku wa ma. Bc 722 hta dingdung Israela mung dan Asuri ni lata de hkrat sum mat ai hpe yu nna dingda Yuda mung gaw Yehowa hpang de galai shai wa ra re. Rai tim, dingdung Israela ni shut ai mara ni hpe dingda Yuda mung mung hkan galaw nga ai majaw, Yehowa a pawt sindawng ai hte jahten shaza kau hpe hpyi sha nga ai aten re.

Ahkaw ahkang lu ai nig aw n lu ai ni a sut rai ni hpe mya lu mya sha di ma ai. Matsan ai ni hka nlu wa jang lamu ga zing la ya ma ai. Lu su ai ni grau lu su wa tim, matsan ai ni hpe matsan dum ai myit hte garum shingtau ai lam n nga ai sha, grau grau amyat htuk sha

3

ma ai. Tara agyi ni, myihtoi ni, hkinjawng ni mung Karai Kasang hpe shingdu dat let, tinang a lu lawm lam a matu ja gumhpraw hpang hkan ma ai. Tara maigan ni a hpara ni nawku htingnu hta shadun nna nawku tim ma ai. Tinang a hpu nau shada bawd aw sha,

II. Myihtoi Mihka A Mungga

(1) Yehowa a man e Israela hte Yuda mung tawt lai ai yubak mara: Yubak mara madung lahkawng hpe tawt lai ma ai. (a) daru magam arawng aya hpe marin marit ai majaw mungdan a ningbaw ningla ni mung masha ni, num ni, matsan mayan ni hpe masu magaw, adip arip rai roi sha ai yubak mara tawt lai nga ma ai. Dai majw Mihka gaw 2:2 hta “Dai ni gaw yi hkauna marit nna kashun la ma ai; nta hpe ra nna, gare la ma ai; kaja ai wa hte shi a dap hpe, madu hte shi a sali wunli hpe, adip arip di kau mu ai” ngu tsun ai re. Mastan mayan, gai da gaina ni, ma kaji ni ntsa kashun kashe rai amyat htuk sha ma ai. (2:9). Yi sun hkauna zingla kau hkrum ai ni gaw, yat yat du sat yam nga sut rai ni ginlut mat nna, hpang jahtum, mi tinang madu ai lamu ga hta mayam hku bai n chyang chyang ra ai de du mat wa ma ai. Dai hku nna dip sha roi sha ai ni gaw lamu ga mung ting la, dai lamu ga hta shangun sha na mayam mung lu la rai lam lahkawng hku kashun la lu nga ma ai. Dai zawn grai nhkru ai hku maw mawn ai majaw Yehowa a man e dingnye lu ma ai (2:1). Bai nna hpaga ga ai ni mung n man ai joi jang ni hte dut lu dut sha rai masu magaw hte sut su nga mai lam tam ma ai (6:11). Arawng aya lu ai ni hte tara agyi ni mung mayun kum hpa la nna, tara rap ra lam hpe shingdu dat kau let tinang a tingyeng a matu asak hkrung ma ai (3:11, 7:3). Mungdan a ningbaw ningla ni mung mung, Karai Kasang hpe hkrit hkungga ai lam n nga ai sha n ga, masha ni kaw na baw daw sha lu na matu dan dan leng leng masu magaw ai myit hte woi awn ma ai. Dai majaw Mihka gaw “ nanhte gaw kaja ai hpe n dawng nna, n kaja ai hpe ra myit dai; mung masha ni a hpyi hpe nanhte gaw kau nna, nrut nra ni hta kap ai shan hpe machyin kau myit dai; nye a masha ni a hkum shan hpe pyi nanhte sha nna, shanhte a hpyi hpe gaw kau ai hte, nrut nra ni hpe agrawp kau nhtawm, dibu hta shadu na matu azat nna, sau di hta rawng ai shan zawn shatai mu ai” (3:2-3) ngu myu sha shada mya sha hkat ai yubak hpe madi madun wu ai.

(b) Bai yubak mara langai gaw lawhpa marin marit ai lam rai nga ai. Law hpa marin marit ai lam gaw mung up du gyi salang ni sha n rai myihtoi ni, hkinjawng ni ngu ai makam masham hta woi awn ai, ningbaaw ningla ni kaw mung byin pru nga ai. Dai majaw Mihka gaw, “Du ni gaw mayun kumhpa matu tara dara ma ai; de a hkinjawng ni gaw shabrai lu hkra sha sharin ya ma ai; de a myihtoi ni gaw maun (money) lu hkra sha, htoi ma ai: rai ti mung, shanhte gaw, Yehowa hpe shamyet shanat let, Yehowa gaw anhte a kaang e rai nga ai, n rai ni? anhte ari ahpri hpa hkrum na n rai, nga nna tsun ma ai. Dai re ai majaw, nanhte a jaw e, Ziun gaw yi hkauna zawn shawt kau ai hkrum nna, Yerusalem mare gaw marawng marang sumpum tai mat na hte, nawku htingnu bum mung, nam mali na tsaw ai kawng ni zawn, tai mat na ra ai” (3:11-12) ngu tsun shadum wu ai. Bai myihtoi ni, shanhte hpe mayun kumhpa law law jaw ai ni hpe ngwi pyaw ai ga tsun, mayun kum hpa n jaw ai ni hpe dagam dala ga tsun ma ai (3:5). Mihka zawn teng

4

man ai mungga tsun ai ni hpe gaw “ myihtoi hkum htoi myit; ndai lam htoi mai na, n rai: shatan nhkan ga galoi n htum hkraw ai, nga nna jet ma ai” (2:6). Dai majaw yubak mara lu ai ngu Mihka myihtoi ga tsun ai rai nga ai.

Dai ni anhte Myen Mungdan hta mung, daru magam arawng aya lu ai mung masa ningbaw ningla ni law law mung, mung masha ni , num ni, matsan mayan ni hpe masu magaw, adip arip rai roi sha ai yubak mara tawt lai nga ma ai. Sut hpaga tam ai ni law law mung, n man ai joi jang ni hte dut lu dut sha rai masu magaw hte sut su nga mai lam tam ai ni law law rai nga ai. Makam masham ningbaw ningla ni law law mung, arawng aya, shingkang shingwang, ja gumhpraw law hpa ra marin ai lam law law rai nga ma ai. Myihtoi Mihka gaw, dai zawn woi awn ai ningbaw ningla ni the ja hpaga tam ai ni hpe Yehowa a man e dingnye lu ai ni re ngu shadum nga ai (2:1). Ya dai ni, anhte chyurum Wunpawng Sha Ni, Yehowa a chyeju hta tengman ai shanglawt lu la na matu shakut ai shaloi, ningbaw ningla ni yawng, dai zawn re ai baw, yubak tawt lai ai lam n nga na matu shadum la nga ai. Ja hpaga sut gan tam ai shaloi mung tengman ding hpring ai hte tam la ra ai lam shadum la nga ai re.

(2) Mungdan a yubak mara a majaw Yehowa jahten sharun kau na lam: Yehowa gaw Yerusalem htingnu kaw na matai dawp na matu ga ntsa de pru sa wa nga ai ngu, Yehowa hpe lamu kasa langai zawn hkrang shala let mungdan hpe jeyang na ra ai ngu Mihka htawn tsun ai re (1:2-7). Bum ni gaw shi a npu e byawng mat nna, kadit ni gaw; wan makau na gitbaw hte, nhkap na lwi hkrat wa ai hka zawn, ga mahka wa na mara ai (1:4). Tawk la ai hpara sumla ni yawng agrawp kau ai hkrum nna, shawa num jahpu hte lu la ai arai ni, hkru mat na ra ai (1:7) nguYehowa hta sadi ndung ai sha hpara shaje ni hpe nawku nna lu la ai arung arai ni yawng shaza kau hkrum na ngu tsun wu ai. Dai aten hta, “ Ziun gaw yi hkauna zawn shawt kau ai hkrum nna, Yerusalem mare gaw marawng marang sumpum tai mat na hte, nawku htingnu bum mung nam mali na tsaw ai kawng zawn tai mat na ra ai”( 3:12) ngu Yerusalem hte Yerusalem nawku htingnu jahten shaza kau hkrum na lam tsun wu ai. Shingran katsi ai shara shatai nna, mare masha ni gaw asawng asang shara tai na mara ai. Nye amyu masha ni hkrum ai shatan nhkan, anhte a ntsa e mara na ra ai (6:16), ngu nna Hkaw hkam Omri hte Ahab ni zawn nhkru ai bungli galaw ai majaw Yehowa jeyang na ngu tsun ai rai nga ai. Mung up ai ni hte arawng aya lu ai ni, hkinjawng ni hte myihtoi ni jeyang hkrum na. Shanhte n tara ai hku adip arip hte la da ai lamu ga ni, ja gumhpraw ni hpyen ni a lata de bai du mat na ( 2:2-5). Dai zawn, hpyen ni hpe jai lang nna Yehowa jeyang ai aten hta hkinjawng ni hte myihtoi ni Yehowa a shingran hpe tam na ra ai, rai tim shingran lu la na n rai (3:5-7).{Dingdung Israela hpe BC 874-852 lapran up ai wa re. Phoenicia king-priest a kasha Jexebela hpe la wu ai. Jezebela gaw Bala nat hpara la shang wa ai. Ahab mung capital city hta bala temple shachyaw nna, tara shang woi nawku wu ai. Makam masham, mung masa, sut masa ni yawng God’s purpose hte nhtan shai ai sha n’ga ntara ai hku gumshem up hkang wu ai. Nabot ngu ai wa a sun hpe hpyi la ai shaloi Nabot gaw ji wa ni a Sali wunli re majaw n

5

jaw wu ai. Shaloi Ahab a madu jan Jezebela na pawt nna Nabot hpe sta kau wu ai.}{ Omri (885-874) gaw nambat 6 ngu na dingdung Israela hkaw hkam re. Myit tsaw myit dap ai hte Israela hpe K.K a man e yubak woi galaw ai wa re}.

Dai ni anhte Chyurum Wunpawng Sha Ni a sak hkrung lam hta mung Yehowa she dai ni du hkra hpyen wa a lata kaw na makawp maga la ai hte, tsin yam hkrum sha nga ai ni yawng hpe yu lahku bau sin makawp maga la nga ai majaw, amyu langai hku matut grin nga lu ai hpe myit dum shangun nga ai re. Kaga amyu masha ni hpe hpa manoi ai hku n rai, tinang a hpaji, lak nak atsam, ningbaw ningla ni hta hpa manoi ai hku n rai, tinang a nhprang sut rai ja gumhpraw ntsa hta hpa manoi ai hku n rai, Yehowa hta chyu sha sadi dung kang kang ai hte tengman dinghpring ai lam hpe tsaw ra let, myu a shawng lam hpe gaw gap sa wa na matu shadum sharin ya nga ai re.

(3) Yehowa bai mawai la na:Karai Kasang a amyu sha ni bawng dung ra mat ai ngu ai gaw, lam yit ai hku Yehowa a man e sak hkrung hkawm sa ai majaw ari hkrum ai re. Rai tim, Karai Kasang gaw sagu rem wa zawn bawng dung nga ai myu sha (sagu) ni hpe malap kau ai n rai. Shi nan bai hkan tam ai hte shi hpang bai hkan nang hkra woi lakawn la na re. N’gun n rawng ai, atsam n rawng ai, myit mada shara n nga ai, aroi arip hkrum sha ai myu sha ni a matu Karai Kasang gaw akyu bai jaw na re. N’gun ja ai amyu bai shatai na re (4:6-7). Babelon de bawng dung hkrum na re. Rai tim dai kaw mung Yehowa tsaw ra myit hte makawp maga na ra ai. Babelon kaw na mung bai hkrang shaw la na ra ai (4:10).

Yehowa gaw Israela hpe sha n rai mungkan ting na mungdan ni a yubak mara majaw hpe jeyang na ra ai. Aten ladaw langai mi hta Yehowa gaw Dawi a ru arat gaw hkaw hkam tai let Karai Kasang a sagu hpung hpe bau maka na ra ai rai nna, mungkan ting shi a hpung shingkang hpe mau na mara ai (5:2-6). Yerusalem gaw tara rap ra ai lam hte (justice) hte Karai Kasang a ga hta makam masham manoi manat ai lam (faith in the words of Yahweh) a ka-ang daju tai na ra ai (4:2; 7:11-12). Dai zawn bai mawai la na lam gaw, Yehowa a tsaw ra matsan dum lama ai a marang e sha, byin tai wa ai lam rai na ra ai. Dai gaw Yehowa a myit masa ningja hpe shapraw dan ai lam rai na ra ai.

Yehowa tengman ai myihtoi ni the shadum sharin ai hpe ahkyak n da ai sha, lawhpa marin ai myihtoi ni , tengman dinghpring ai lam nnga ai makam masham ningbaw ningla ni a ga hta, mung up du gyi salang ni, makam masham ningbaw ningla ni, mung masha ni shani shagu asak hkrung ai lam gaw Yehowa a dingnye hpe hpyi la ai lam tai sai re. Dai zawn re ai asak hkrung lam hte nawku htingnu shagreng ai, hkungga nawng jau ai, shakawn kungdawn ai lam ni galaw ai majaw Karai Kasang shanhte a nawku htingnu hta nnga sai. Hkungga hte shakawn kungdawn lam ni hpe mung n hkap la ya ai re. Karai Kasang hpe tam tim, Yehowa nhtan ya mat ai re. Dai majaw Israela ni jasam masha ni a dip sha roi sha zingri sha ai hkrum ra ai aten ni law law nga masai re. Rai tim Yehowa gaw tsaw ra myit kaba ai Karai Kasang rai nga ai hte maren, sadi dung kangka ai

6

ni n kau mi hte myit malai ai ni nkau mi a marang e Israela hpe bai hkye mawoi la ai lam hpe Israela a labau hta adan aleng mu lu ga ai re. Dai ni anhte Chyurum Wunpawng Sha Ni a prat tsin yam kaw na mung, Yehowa wa hta sadi dung kang ka ai ni, myit malai nna Yehowa a man de bai nhtang wa ai ni a makam masham marang e shalawt la na re, hkye la na re ngu pahkam jaw nga ai re.

(4) Yehowa Sharawng awng ai kumhpa: Arung arai (material) nawng jau ai lam n re. Myit kraw lawang kaw na dinghpring ai lam, tsaw ra matsan dum ai lam hte Karai Kasang a man e myit nem let hkan hkawm ai lam rai nga ai. Dinghpring ai (Justice) – wuhpung wuhpawng hta langai hte langai tara rap ra ai hte tengman jaw ang hku ganawn mazum ai. Tsaw ra matsan dum ai (kindness) – Karai Kasang shinggyim masha ni hpe tengman kang ka ai tsaw ra myit hte tsaw ra ai zawn, wuhpawng kata kaw shada tengman kang ka ai hte tsaw ra ai. Karai Kasang a man e myit nem ai let hkan hkawm ai – Karai Kasang hpe tsaw ra ai hte kam hpa manoi manat ai sha n’ga, tinang a asak hkrung lam ma hkra hpe Karai Kasang ra ai hku madat mara asak hkrung ai lam rai nga ai.

Dai ni anhte Chyurum Wunpawng Sha ni hpe shadum nga ai lam mung, Karai Kasang gaw anhte lu ai arung arai ni hpe kumhpa hku ra ai n re. Hkyik hkam ai nawku htingnu hte hkungga law law nawng nna, asak hkrung lam ni gaw tengman dinghpring lam n nga, kaling kachyit re ai kumhpa hpe mung n ra ai. Anhte kadai ni re ngu ai hpe she kum hpa hku ra sharawng ai re ( God wants not what we have but who we are, ourselves and nothing else). Tengman dinghpring ai, tsaw ra matsan dum ai, Karai Kasang a man e myit nem let asak hkrung ai sak hkrung masa kumhpa hpe she Yehowa Karai Kasang ra sharawng ai re.

III. Sharin la na lam ni:

(1) Ningbaw ningla yawng hpe Karai Kasang jaw ai ningbaw ningla ni re ngu nna n mai sawn la ai. Israela ni a Ga Shaka Dingsa prat na labau hpe yu ai shaloi Karai Kasang n ra sharawng ai mung masa makam masham masa ningbaw ningla ni law law re ngu ai hpe mu mada lu nga ga ai. Karai Kasang hpe hkrit hkungga ai hte myit hpraw san ai mung masa, makam masham masa ningbaw ningla ni hpe she Karai Kasang ra sharawng ai.

(2) Tara rap ra ai, tsaw ra ai, myit nem ai hte Karai Kasang a man e asak hkrung ai lam gaw, manu dan dik ai asak hkrung lam re. (3) Hpara shaje ni hpe nawku ai, law hpa myit marin ai, n tara ai hku roi rip amyat htuk sha ai, sawt ai myit hte Karai Kasang hpe kam sham ai lam ni hpe ru pawt yawng gawt kau na matu Karai Kasang ra sharawng nga ai. (4) Karai Kasang gaw anhte a yubak mara ni hpe raw dat ya na matu myit galu ai hte la dingda nga ai, rai tim myit malai n lu ai ni hpe gaw aten du jang jeyang na re. (5) Karai Kasang mara raw dat ya ai shaloi, ningnan bai gram lajang la ai hte shaman chyeju ni jaw nga ai.

7

(6) Mihka a myithtoi ga hte maren, Beleham mare hta Yesu shangai wa nna, Yesu Hkristu a daru magam hpung shingkang gaw dai ni nan anhte hkam sha nga saga ai. Tsaw ra myit hte tara rap ra ai, ngwi pyaw sim sa ai lam ni hte Karai Kaang a mungdan masha hku asak hkrung lu na matu Yesu Hkristu jahkum shatsup shaman ya nga ai.

Gin len shalai ai, Rev. Dr. Lahpai Awng Li MIT, Insein. 8th Nov, 2015.